Pe la Pekin um i tih
|
PE LA PEKIN UM I TI
By Mr. Lalchawnlien Taite “Mihriemin Pathien chu ân rûkpêk ding am a nih? Nangni chun in mi lân rûkpêk rawp el hi…” (Malaki 3:8) Pe ro, chuongchun pêkin um in tih, ṭhahnemngaitaka inkhia, namdêna, sâwi muka, liem zar zara, in mal chungah pêk nîng in tih. In inkhîna ngai bawkin inkhipêk in ni ding a ni sih a," a ta. - Luka 6:38 Tarik 30.04.2012 (Thawtanni) khan pawisa ladawk dingin ATM ah ka fe a. Ka hmaa mi pa’n a hmang zovin ka ATM Card chu a thunna ah ka zuk thun vea. Pawisa chu hung suok el ta lovin ATM khawl chu a to ta vung vung el a. Second tlawmte hnunga chun saptawnga inziek “SORRY UNABLE TO PROCESS” ti chu lekha phek chite hin a hung suok ta lem a. Vawikhat ka hei thaw tha nawk khawm chun a hmasa a thu inziek pangngai ang bawk kha khawl chun a hung her suok nawk a. Chuphingleh, ka account a sum umzat chu ka hei en a. Chutaka chun ka ilaksuok tum zat chie, hung suok thei ta lo kha, ka account balance a’nthawk a lo um ta naw (deducted) a. Ka account neina Bank-ah fe a complaint ding ani hi tiin lungril ka siem tah a. Amiruokchu, Office sin ah ka buoi lai tak ani leiin ka fe el thei ta nawh a. Chuonga buoinain ami chim buoi lai zing chun Office sintulna leiin khuol inzin a hung tul ta leiin kan zin tah a. Hlaw ka la lawk naw leiin ka account-a sum um sun sunhai chu lasuokin chuonghai chu kalman le khawrsawin ka hmang tah a. Tarik 07.05.2012 (Thawtanni) chun ka hlaw chu ka account-ah an mi hung thun pek ta a. Chu ni vek, zantieng chun pawisa lasuok dingin ka Ni naupa leh ATM ah kan fe a. Thil dang dang kan thaw dinghai po kan thaw zo hnungin in kan hung inlawi nawk nghal a. Ka Rang kut ah Lalpa chanvo “Sawmapakhat” chu ka zuk inhlan nghal a. Lungril ah hadamna a hung lut nghal chu tie. Ni thum zo chun, Office sin tulhai thaw zovin ka umna (posting) hmun tieng chun ka kir nawk nghal tah a. Tarik 14.05.2012 (Thawtanni) in Office sintulna leiin ka staff pakhat leh kan zin nawk a. Suna kan sunbu (Lunch) fakna ding tiin ATM ah pawisa lasuok dingin ka fea. Pawisa chu ka hei laksuok a. Nisienlakhawm, maktakin ka account-a pawisa ka thun zat neka tam pawisa a lo um ta tlat chu tie. Chuphingleh, Mini Statement (pawisa lut le suok zat inziekna)ka hei laksuok a. Chutaka chun chieng em em el hin tarik 30.04.2012 (thawtanni) a ka pawisa laksuok thei ta naw, ka account a’nthawka bohmang ta hnung ku kha, ka account a bawk a lo hung lut nawk tah kha a lo nia. Ka va zuk lawm char char ngei de aw. Chutak chu ani an nawm ei biek Pa ku hi Pathien hring ani zie. “Tuihai chunga chun i bei chu pei la, Ni tamtak hnunga chun i hmu nâwk ding a ni sih a” (Thuhriltuhai 11:1) ti hi ka chunga a tak ram ngeiin Lalpa’n a min paltir niin ka hriet. Asanchu, A chanvo ka pek lei ania. Ka tading chun ni tamtak ni lovin ni tlawmte hnungah Sawmapakhat pek leiin malsawmna ka hmu a nih. Ei pek leia ei lawmman ding chu chan naw tawp ei tih. Sum hmangna ding ka hau deu leiin April, 2012 khan Sawmapakhat ka pek naw a. Khanga ka pawisa a mi zuk inhmang pek el kha ka tading chun inro a um em em el ani. Ka tading nilo ka lo cheltang leia chan ka ni ti Pathien Thlarauvin ami hung inhriettir taa. Pawi ka ti em em. Chuleiin, hlaw lak le inruolin Sawmapakhat chu pe tla nghal dingin lungril ka siem taa; chuong ang ngei chun pe tla theiin ka hung um taa. Ka suksuolna leiin pawi ka tia. A neitu Pa kuomah ka zuk pek zet chu, ni tamtak a ngainaw khawp el, ni tlawmte hnungah ami hung pekkir nawk nghal el ani chu tie. A tik a va zuk tlai em em ngei de aw. Sawmapakhat hi Lalpa Chanvo ana. A kohran thienghlimhai hin indiktak le phaltaka pe ding ei nih ti a min chuktirna hi mi tuelkhawma ngaitha lova Ama ei hmangaina leiin pe seng ding ei nih. Sawmapakhat chungchanga Pathienin ka lungrila sin a thaw le ami hne em em hlak thenawi pathumin a hnuoia ang hin lo en ei tih. 1. SAWMAPAKHAT PE NAW CHU RUKRU A NIH: Mihriemin Pathien chu ân rûkpêk ding am a nih? Nangni chun in mi lân rûkpêk rawp el hi. Nisienlakhawm, nangni chun, "Ieng âm kan inrûkpêk che a?" in ta. Sâwma pakhat pêkhaia le thil-inhlânhaia hin a nih (Malaki 3:8). Mihriemin Pathien chu an rukpek ding am a nih? a tia. Rukruin a mihriem chanpui pawisa amanih, thuomhnaw amanih anruk hman suol ah ei ngai a na. Anleh, Pathien chanvo Sawmapakhat pelo (inru) hai hi te iengtinam ngai ei ta le? “Mihriem” a zuk ti tak hi, Mihriem chun Pathien chanvo Sawmapakhat chu anruk ding ani naw zie an lang chieng em em a nih. Pathien thuomhnaw/pawisa inrutu chu mihriema tiem thlaklo, thlarau neilo ramsa ang mei mei a ni. Mihriem, Kristien inti ve si chun, Ami neitu pawisa chu ei inruk a thieng naw hrim hrim a nih. Anleh, iengleia ei inruk hram hram am ni tang ata le? Malsawmna ei i dawnghai hi ei lungawi pui tawk naw lei amani ding; ei sum lamdawk neka insang lemin ei taksa khawsakna a hung insanga nakie le rul nawk dinga ei lo puk pek lem amani ding. Unau, suonlam siem ding ni inla chu hril ding nei teu seng ei tih ka ring. Pek kawnga ruok hin chu tukhawma suonlam ei siem a thieng nawh. Ei lo siem ani khawma, Pathien ngai a chu suonlam a tling tak tak thei nawh. “Chuongchun, Juda mihai po po chun, bu sâwma pakhat dâm, uoin dâm, hriek dâm thawlâwm sie khâwmnaa chun an hung lâk khâwm tâwla” (Nehemia 13:12). Ei pek ding makmaw a nih. Lo theilova pe seng ding ei ni bawk. Ei hnam, kohran le insung-in harsatna ei tuok mek hai khawm ku hi Pathien ei lo suom char char lei ani hiel naw ding maw? Sawmapakhat pe ngailo Kristien chu RUKRU KRISTIEN, RUKRU HNAM, RUKRU KOHRAN, RUKRU INSUNG ei ni el naw ding maw? In ngaituo chieng a va tul ta de! “Nangni chun in mi lan rukpek rawp el hi…” Iengchen am Pathien ei la suom ding? Tawp zai rel tang ei tiu le, “Van tukver hai hung hawngin, a siena ding um naw khawp rauin” malsawmna chu ei chunga a hung bur theina dingin. Khuo pakhat a hin vawikhat chu rukru an man a. A bur le bel inruk hai po po chu hruiin an khit bawr a, rukru pa chu an in awrtir a. A kut phierhnungkhirin an khit a. VDP le khawsung tlangval ruol chun chu rukru pa chu khawlai dung an fang pui a. An sawisak hrep a. A thenin an vuok a, a thenin an hnek a, a thenin an pet a; kungfu inchuknain an hmang ani deu tak ni’n ka hriet. Ei ni Kristienhai khawm ku hi aw ei pawisa inruk zat hi Pathienin min awrtir in ami hrem ding nisienla chu Kohrana lu lawk deu deu, abikin officer ruol Sawmapakhat ngaisak naw mi hai PARTHI ding chu a va zuk inkhai bawr nasa awm de aw. An hmel le pum khawm inlang hleithei lovin tangka ruok hnung le hma ah ei hmu thei ka ring chu tie. Roreltu hmaah thiemchanga ei um theina dingin rukru lungril hi hlipfai tang ei tiu le. 2. INDIKTAK LE PHALTAKA PE DING EI NIH: Luka 6:38-na a chun “Pe ro, chuongchun pêkin um in tih…” tiin amin chuktir a. Sawmapakhat le thilinhlan hrim hrim phaltaka petuhai chun Pathien ah Investment (sum sukpung) an thaw a ni. Asanchu, “Van tukver hai hung hawngin, a siena ding um naw khawp rauin” ami la pek ngei ding ani ti chiengtaka hrilin ei um a nih. Mi fie ro tia min chuktirtu chun ei fiena hai chu a tlawnin inchangtir naw hrim hrim a tih. Sawmapakhat ding andai nawh ei tia, pe lovin ei um hlak. Pathienin sawmapakhat ding hi mi lo pe sa naw law law hlak sienla tha lem ding bah. Mission thawktuhai chu Headquarter a’nthawk an sawmapakhat an kat (deducted) vawng hnungin an hlaw an hmu hlak a. An tading chun sawmapakhat pek a awlsam hle. Amiruokchu, an sawmapakhat chen khawm an ni’n an hmu nisienla chu, sawmapakhat pe naw Mission thawktu khawm ei um nuol ka ring chu tie. Mani hmasielna le duamna hai hi bansan tang ei tiu. Mission thawktu nilo hlaw nei ve hai po po khawm ei hlaw a’nthawk ei sawmapakhat an mi kat pek pei nisienla chu sawmapakhat pe kim thap ei tih. Chu lem chu thil theilo ah ngai ei ta. Unau, Lalpa’n a tadingin ei ringum le ringumnaw ami fie nuom lei a ni. Ei pek naw leiin ei hlaw khawma ami dai naw chang a tam hlak. Ei tiksiet leiin ei neisun khawm ami lak pek nawk pei el hlak a nih. Ei ti nawna tieng tieng pawisa hmangna ding a hung inhersuok a. Ei ni bawkin ei tuor nawk hlak. Ei ringumnawna le duamna leia tuor chi ei ni hrim a nih. Thenkhat hi chu mani sawmapakhat zat chie khawm indiktaka pe ngamlo/ ngailo ei um ngei ka ring chu tie. Ei ringum naw zie chu malsawmna dawngthlak khawm ei ni naw a ni hi. Luka 16:1 – 9 na a chun sum enkawltu ringum naw zie ei hmua. A lo fakruk nasa ta leiin sum neitupa chun a sum kawltu kuomah endiktu (auditor) a tir ta a. Sum kawltu chu a lungril an hang ta em em a. Theitawp suoin a sum fakrukhai po po chu thup a tuma. Nisienlakhawm, a thil suksuol chu mandawkin a hung um tho tho ta a ni. Hunsawt nawte sunga ding chauvin Pathienin sawmapakhat hi ei kutah ami lo inkawltir ania. Hlepruk le fakruk chingmi sum enkawltu Kristien ei lo ni chun, Lalpa’n ei ni khawm a mi mandawk hun a la thlung ngei ngei ding a nih. Chupha chun tlanhmangna ding reng reng hi vankhuphnuoia hin hmu zo nawm ei nih. Indiknawtaka mani tanghma ngaia ei hringnun ei la khal pei ani chun, Lalpa’n sawmapakhat ding umnaw rak khawpa retheiin ami la siem el thei an sawn naw! Pawisa hlepruk chingmi ei lo ni chun, tuhi ei tadinga hun lawmum chu a nih. Lalpa’n a chanvo ami lo inkawltir ku hi ei tading rawm ei sawn? Finance Secretary sin chel mei mei ei ni. Aneitu kuomah pe vat ei tiu, chuong ani naw chun ei nei thil danghai khawm lakpek theina thuneina a nei angin ami lakkir pek thei zing a nih. Ringumtak le feltaka ei pek ani chun, “thahnemngaitaka inkhia, namdena, sawi muka, liem zar zara, ei (in) mal chunga pek ning ei (in) tih” (Luka 3:38). 3. HMANGAINA LEIA PE DING EI NIH: “Pathienin khawvêl a hmangai bêk bêk a, chuongchun, a Naupa khât nei sun chu a pêk a…” (Johan 3:16). Pathien hmangaitu chun sawmapakhat chu a pek ngei ngei ding a nih. Ei hmangai em em ei nauhai laia mi pakhat tak amani, pe dingin Lalpa’n Abraham angin ami phut kher ta nawh. Ei sum hlawsuok a’nthawka sawma-pakhat ami phut a nih. Ama chanpuol lieu lieu a nih. Ei pek leiin Lalpa’n malsawmna’n ami vur ei la hriet naw leiin amani ding ei pek sunzawm nuom ta naw hi! Enta, Ama naupa ngei khawm inro der lovin ei tadingin khawvel ah a hung tir a. Ei thlarau sandamin a um a. Ei lawm hle an naw maw? Ei ta khawm nilo, sawmapakhat khawm maw a neitu kuomah ei zuk pek rin ngawi ngawi el chu? Ei piengtharna hi andik naw ani hiel naw maw? Piengtharna indiktak nei ni inla chu tu hril khawm ngailovin Lalpa ei hmangaina leiin pe em em ei tih. Krista-ah piengtharna indiktak nei ni inla chu aw, Pathien pawisa ei inruk ta dal ding ana. Ei kutkem nei ku hi ei hnam, ei Kohran le ei insungin ei thawhla pha ani hiel ta naw maw? Ei ni ngei khawma a ruka ei tuor ei tuor pha ani hiel naw maw? Pathienin pe dinga ami ti hi lungrila insirna nei der lova indiktaka pe ding ei ni a nih. Pathienin mi fie ro a tia. Pek kawngah inthlahrung der lova fie tawp el ding a nih. A chanvo pe dingin ami tia. Chun A chanvo ei pek zo hnunga malsawmna ei dawng ding chenin ami tiem nghal a nih. Ei hmu chie le hmu chie naw chu tuhin ei fie a ngai a ni. A mi pek naw vei vei chun nuor khawm ei phu hlie hlie ni’n ka hriet. Tulai khawvel en in ei taksa khawsaknaa hai khawm hma ei hung sawn tung pei a. Mani inlum maksana Sawrkar, Company le a dang danga sinthaw a fak zawngin khawpuia khawsa ei hung tam deu deu a. Chuong khawpui abiktakin Delhi, Bangalore, Pune, Mumbai le Guwahati hai a chun tu kohran bik umlovin Hmar Fellowship indinin ei rengin ei inlawi tlang tawl a. Nasatakin thawlawm pek kawnga kawm hma ei lak nasa tawl a. Ei Fellowship a hung inthang lien duok duok a. Lawm a um hle. Amiruokchu, hieng ang hin ngaidan pakhat ka nei a (Fellowship a tha naw tia ka sawiselna nilovin), khawlai hmuna khawm um inla ei MOTHER CHURCH hi ei lungril a hin hringzing sienla. Ei sawma-pakhathai khawm hi a tam lem ei Mother Church ngei a hang pe thei zat zat inla chu tuta nek hin ei kohran hin hma sawn pui ngei a tih ti ringna lientak ka nei tlat chu tie. Kohran tinin Sawmapakhat hi Ramthim rawngbawlna bik deua ei sie a ni leiin ei hlaw le ei thawsuok ang peiin sawmapakhat indiktakin pe thlap thlap pei inla chu tuta nek hmanin ei rawngbawlna a hung intodel thei ding ana. Ramthima ei rawngbawlnahai khawm hma hung sawn tung pei tang ata. Hmun le ram ei mamaw a, ei lan chawk thei naw tamtak um mek hai khawm hung inchaw thei tang ei ta. Ei thawktuhai lawmman khawm hlaw a tiem thlak hung ni ve tang ata. An chengna ding In (quarter) hai chen khawm mi dang In hluo talova ei ni kutsuok ngeia bawl ah hung khawsa thei tang an ta. Tuta neka tam Missionary hung tir suok thei ta bawk ei tih ti chu ka ring tlat a nih. Latu Kristien ni talova Petu Kristien indiktak ni seng thei dingin Lalpa’n a tharin ei rengin mal mi sawm seng raw se. ========== |
© Copyright since 2011 design and powered by
HmarWebs